Carlos García, concelleiro de Relacións Institucionais, Comunicación e Axenda 2030 de Foz e responsable de Organización do PSOE local, resume o 2025 como «moi positivo» e subliña que este foi «un ano dae especial expansión da marca Foz», sustentado en «indicadores de crecemento sólidos e sostidos» que, di, son «un sinal claro de que estamos no camiño axeitado». Destaca que, malia gobernar en minoría, «fomos quen de sacar adiante acordos traballados tanto a esquerda como a dereita» en ámbitos como a auga, as infraestruturas viarias, a mobilidade ou a orde económica. Reivindica unha maneira de gobernar baseada en escoitar e asumir responsabilidades —«gobernar non é complicado, pero require valentía e acerto»— e apunta que esa filosofía xa permite percibir avances, cunha folla de ruta que inclúe o asentamento do modelo de mobilidade, melloras no barrio mariñeiro e máis investimento nas parroquias. A maiores, de cara a 2026, fixa como prioridades avances en materia de vivenda pública, de sanidade, na reversión de terreos portuarios ou novidades acerca do «ansiado auditorio para Foz».
– Remata un novo ano. Que balance fai deste 2025?
– O balance é moi positivo. Foi un ano fantástico para Foz en moitos aspectos clave e os datos o avalan: a evolución demográfica, o ciclo económico, a paz social e, especialmente, a finalización de numerosas obras que estaban en marcha. Todo iso vai conformando a imaxe do Foz que queremos: un municipio máis amable, moderno, funcional e no que dea gusto vivir.
– Ten responsabilidades no Goberno de Foz como concelleiro de Relacións Institucionais, Comunicación e Coordinación da Axenda 2030. De todo ese traballo, de que se sente máis orgulloso este ano?
– Sen dúbida, este foi o ano da expansión da marca Foz. Falamos dunha pequena cidade que presenta indicadores de crecemento sólidos e sostidos en demografía, renda per capita ou ocupación, o que reforza a pedra angular do noso compromiso coa veciñanza: facer de Foz un bo lugar para vivir, e ser o municipio que máis medra en poboación da comarca, segundo os datos do INE, non é casualidade; é un sinal claro de que estamos no camiño axeitado.
«Todo vai conformando a imaxe do Foz que queremos: un municipio máis amable, moderno, funcional e no que dea gusto vivir».
– Xunto ao alcalde Fran Cajoto e ao resto dos edís do goberno municipal, tiveron por diante retos importantes ao longo deste ano. Que balance fai dese liderado e cal diría que foi o maior desafío compartido en 2025?
– Son unha persoa moi analítica e cando fago balances deste tipo procuro buscar unha foto fixa nun contexto moi líquido, como son os tempos que nos toca vivir. Nun escenario global marcado pola polarización, a descalificación sistemática e mesmo o odio, a foto deste ano en Foz foi a do entendemento. Cun goberno en minoría fomos quen de sacar adiante acordos traballados tanto a esquerda como a dereita para sentar as bases de piares fundamentais como a xestión da auga, novas infraestruturas viarias, melloras substanciais na mobilidade urbana, orde nas contas municipais ou garantías regulamentarias para a educación superior. Iso só pode explicarse pola altura de miras e a calidade humana da clase política focense, cando se deixa a un lado o insustancial e se centra na prosperidade dun pobo coma Foz cunhas potencialidades incribles.
«Nun escenario global marcado pola polarización, a foto deste ano en Foz foi a do entendemento. Cun goberno en minoría fomos quen de sacar adiante acordos traballados tanto á esquerda como á dereita »
– Ten dito en varias ocasións que a verdadeira transformación comeza nas cousas pequenas. Que cambios ou transformacións cre que se poden percibir xa en Foz a curto prazo neste vindeiro ano?
– Así o creo firmemente. Teño un lema que manteño como un credo persoal: as cousas ben feitas, ben parecen. Entramos no goberno cun xesto claro, un cambio de dirección nas arterias viarias do corazón de Foz, e funcionou porque a mensaxe estaba na xente. Gobernar non é complicado, pero require acertar, e cando non se acerta, saber rectificar con honestidade. Esa filosofía é a que permite que a veciñanza perciba cambios reais no seu día a día. Non somos curtopracistas, pero o asentamento do modelo de mobilidade, as melloras nas rúas do barrio mariñeiro ou o investimento en parroquias é o que está por vir.
«Entramos no goberno cun xesto claro, un cambio de dirección nas arterias viarias do corazón de Foz, e funcionou porque a mensaxe estaba na xente»
– No ámbito do partido é responsable de Organización. O vindeiro ano estará marcado pola proximidade das eleccións municipais. Como ve este escenario e que papel considera que debe xogar o partido en Foz?
– Afrontamos ese escenario con responsabilidade, serenidade e ambición. O Partido Socialista de Foz é unha garantía ao servizo da cidadanía, capaz de organizar, escoitar e sumar. En Foz imos seguir fortalecendo un proxecto histórico, social, aberto e con vocación maioritaria, centrado en ofrecer solucións solventes aos veciños e veciñas de todo Foz.
«O Partido Socialista de Foz é unha garantía ao servizo da cidadanía, capaz de organizar, escoitar e sumar»
– E con que retos encara o 2026?
– O principal reto é consolidar o proxecto iniciado e seguir apretando con máis intensidade coa vivenda pública, a mellora dos servizos sanitarios, consumar a reversión de terreos portuarios ou o ansiado auditorio para Foz, que xa vai sendo hora. En definitiva, seguir reforzando un modelo de crecemento sostible, equilibrado e centrado exclusivamente nos veciños e veciñas de Foz.
– Pasa vostede o fin de ano en Foz? Que ofrece o seu pobo nestas datas?
– Si, sempre que as obrigacións familiares o permiten paso o fin de ano en Foz. O noso pobo ofrece nestas datas algo moi valioso: tranquilidade, proximidade, vida na rúa e unha programación pensada para todas as idades. É un lugar ideal para despedir o ano en familia ou con amizades, gozando do comercio local, da hostalaría e dunha contorna privilexiada que tamén no inverno ten moito encanto que ofrecer.
Este artículo forma parte del Especial Fin de año, que publica Aquí Diario. Ver el especial completo aquí
